Per quest intent ha la suprastanza communala gia relaschà ina zona da planisaziun. En il fratemp è era cumparì il rapport che definescha normas en connex cun antennas novas. Tranter auter èsi previs, che l’artitgel 44 a da la lescha da bajegiar vegnia revedì. Tranter auter duai tar projects d’antennas novas vegnir sclerì sche las antennas resguardan il maletg dal lieu e correspundan a la protecziun da la cuntrada.
Lieus d’abitadi duain vegnir protegids uschè bain sco pussaivel dad immissiuns da las antennas, e sche pussaivel duain las antennas vegnir cumbinadas cun edifizis ed ovras existentas. Per avair paucs lieus cun antennas, duain las firmas da telecommunicaziun prender en mira antennas cuminaivlas. Il cussegl communal sustegna la moziun. Cura che la situaziun da corona laschia tiers, duai dar ina saira d’infurmaziun per la populaziun.
Moziun tgira d'uffants
En ina moziun pretenda la cussegliera communala Kathrin Ott ina tgira d’uffants per l'entir onn. Quella duai collavurar cun la canorta d’uffants da l’uniun Kibe Laibella, che porscha tranter auter gia ina maisa da mezdi ed ina tgira cumplementara a la scola. Il cussegl communal ha approvà la moziun.
Contract cun Lantsch
Plinavant ha il cussegl communal da Vaz approvà per mauns da l’urna la prolungaziun dal contract da concessiun che segirescha il provediment da l’aua da funtauna cun la vischnanca da Lantsch.
Nizzegiar la forza dal sulegl
Per sanar il tetg da la scola a Lai e construir in’ovra solara supplementara sin il tetg ha il cussegl communal approvà in credit da 292’195 francs.
Gronda roschada en suprastanza
Sut varia ha il president communal Aron Moser communitgà, ch’el na candideschia ord motivs da vegliadetgna betg pli per la nova legislatura che cumenza il 2022. Era Sascha Ginesta, Armin Margreth ed Eilsabeth Sigron-Cantieni hajan annunzià ad el, da betg pli vulair candidar per la proxima legislatura.