La vista è bain ina vista da tschintg stailas – e quella pon chavals, che han fatg lur duair ussa simplamain anc giudair senza avair da prestar insatge.
Avant 12 onns han ils possessurs da la pensiun Ramona e Markus Bläsi decidì da porscher quai – betg mo a chavals pli vegls mabain er a chavals cun allergias e problems cun ils pulmuns. Els èn persvadids, che betg mo carstgauns, mabain era animals hajan merità ina bella fin da la vita.
In cor per chavals
Per ils possessurs dals chavals n'è quai dentant betg exnum favuraivel da porscher questa vita a lur animals: La pensiun da chavals custa per mintga chaval passa 500 francs il mais. Cunquai che blers han dentant ina fitg stretga relaziun cun lur chavals, saja quai per els la megliera alternativa che da laschar endurmentar l'animal mo perquai ch'el è vegl. Che possessuras e possessurs èn pronts da pajar questa summa sa chapeschia betg da sasez - e perquai stima Ramona Bläsi, ch'è creschida si cun chavals ed ha in grond cor per els, quai enormamain.