Jolanda Caviezel, la responsabla da la vendita da december da la Pro Juventute è cuntenta: «En general marscha la vendita da Nadal bain. Nus pudain quintar cun ina svieuta in pau pli auta che l’onn passà, vul dir i pudess dar ina svieuta da 500’000 fin 700’000 francs». Quant aut ch’il gudogn vegnia ad esser na possia per il mument betg vegnir eruì.
Surses na cuntenta betg
En il Surses però marschan ils affars main bain: «Ils megliers onns avain nus fatg in gudogn da 2500 francs cun la vendita. L’onn passà avain nus fatg in gudogn da 400 francs e quest onn vegn quai ad esser anc pli pauc», di Zegna Pittet-Dosch, la responsabla da la Pro Juventute Surses. Sco raschun vesa ella la midada dal sistem: Dapi l’onn passà vegnan las cuvertas d’empustaziun da la Pro Juventute betg pli repartidas entras ils scolars, mabain entras la Posta Svizra. La midada ha i dà, perquai ch’i dat en il Surses mo pli dus lieus da scola ed i dat era vischnancas che n’han nagins scolars pli.
Per projects sco per exempel il pass da vacanzas da stad, ha la Pro Juventute Surses anc reservas. Jolanda Caviezel sco era Zegna Pittet-Dosch èn da l’avis, ch’ins stoppia chattar in’autra schliaziun per puspè vegnir tar dapli entradas.