Siglir tar il cuntegn

Header

cuntegn

Veulden Pendicularas vulan investir 700'000 francs en differents projects

Las pendicularas da Veulden han lantschà il project «Pendicularas Veulden 2020». Gia questa stad vegnan ils emprims projects realisads. Tranter auter duai dar in’ovra solara che producescha dapli energia che las pendicularas dovran durant l’entir onn.

Tar la staziun da val e tar la staziun da muntogna duain vegnir installads panels solars, per part era sin la fatschada. Quels duain producir mintg’onn energia che correspunda al diever da radund 35 chasadas. Sch’i grategia cun la lubientscha da bajegiar lura duain las ovras solaras vegnir installadas gia questa stad.

audio
Pendicularas Veulden investeschan 700'000 francs en lur futur
ord Actualitad dals 18.02.2021.
laschar ir. Durada: 3 minutas 10 Secundas.

Dapli sutgeras, pli pauc temp da spetga

Era questa stad duain vegnir installadas 34 novas sutgeras. La capacitad da la sutgera s’augmenta sin 120 sutgeras. Gia l’onn 2004, cura che la sutgera sin l’Alp Raguta è vegnida construida, è quella vegnida lubida per 120 sutgeras. Ina nova concessiun n’è perquai betg necessaria.

Nagins chanuns da naiv, ma nova pista

Auters projects che las Pendicularas da Veulden vulan realisar, èn meglieraziuns tar la staziun da val e renovaziuns vi da bajetgs. Era duai vegnir construida ina nova pista, che duess esser pli pauc exponida al sulegl. Per pudair finanziar tut han las Pendicularas da Veulden lantschà ina rimnada da daners. Quella cumpiglia era in’acziun da crowdfunding e la vendita dad aczias. Agid finanzial datti era da la vischnanca Tumleastga.

RTR actualitad 12:00

Artitgels legids il pli savens