Siglir tar il cuntegn

Header

Tusaun pudess survegnir in meglier access vers l'Engiadina en l'avegnir.
Legenda: Tusaun pudess survegnir in meglier access vers l'Engiadina en l'avegnir. RTR, Federico Belotti
cuntegn

Grischun Central Viafier retica vul dapli trens la saira sin la lingia d’Alvra

Durant il favrer ha la Viafier retica laschà cursar il venderdi e la sonda saira mintgamai in tren supplementar da San Murezzan a Tusaun ed enavos, cun arrivada a las 23.45 a Samedan. Sco quai che la Viafier retica scriva sin dumonda da RTR, hajan dentant mo paucs nizzegià ils trens supplementars.

Durant la fasa da test è il tren partent da Samedan stà occupà en media cun diesch persunas, e davent da Bravuogn en media cun 21 persunas. Il tren da Cuira en direcziun Engiadina è stà occupà main bain: davent da Tusaun sesevan en media 15 persunas en il tren, e davent da Bravuogn 18 persunas. Cun rinforzar las mesiras da communicaziun, quinta la Viafier retica da pudair augmentar il dumber da passagiers en l’avegnir.

Tren supplementar è in giavisch

La direcziun da la Viafier retica ha avant curt decidì, da prender si ils dus trens supplementars en l’offerta dal proxim urari. Quai vul dir ch’ils trens da la saira tard pudessan gia cun la midada da l'urari il december che vegn, vegnir integrads fix en l’urari.

Il giavisch da la Viafier retica è da laschar cursar ils trens da la saira durant l’entir onn, e betg mo la fin d'emna. L’introducziun dals trens da la saira dependa anc dal chantun e da la Confederaziun. Quels ston lubir ils trens da la saira, ed examinar sch’igl è pussaivel da finanziar la purschida supplementara.

RR novitads 17:00