Construir punts, mirs da segirada e mantegnair vias forestalas. Era quai tutga tar la lavur d’in bostger. En la Val Schons, sur Pignia ed Andeer, ha l’Uffizi da guaud e privel da la natira perquai organisà in curs da construcziun sin radund 2000 meters sur mar, per tut ils emprendists ed emprendistas dal Grischun e dal Liechtenstein.
En tut èn 37 emprendists da bostger en acziun quest mais. Sin 12 plazzals en la regiun Val Schons, Val d’Avras e Valragn survegnan els ina vasta survista sur da las differentas lavurs da mantegniment e construcziun d’infrastructura. Per ch’els survegnan ina buna survista, vegn midà plazzal mintga 2 dis. En Grischun è il curs fitg impurtant e perquai obligatoric, perquai ch’il mantegniment e la renovaziun da las diversas infrastructuras e vias d’access è da muntada existenziala.
Il curs che cuzza duas emnas, vegn fatg durant mintga emprendissadi da bostger. Ils emprendists emprendan a:
- far simplas mesiraziuns
- construir e da mantegnair ovras da construcziun simplas
- realisar il mantegniment current da la via da guaud
- enconuschan las metodas da lain e da rempars las pli impurtantas