Viamala - Patinera artifiziala a Seglias

Il «Eisverein Viamala» (EVV) è vegnì fundà l’onn 2004. Quai cun l’intent da realisar in glatsch artifizial per la regiun Viamala. Sco quai ch’il president actual Stefan Collet ha ditg envers RTR, haja quai da lez temp bain dà ina votaziun en la vischnanca da Seglias. Quella saja stada positiva, pli tard hajan ins dentant decidì da betg far il glatsch artifizial pervi da la tema dals custs da mantegniment.

Nov’emprova per in glatsch artifizial

Ussa datti nova vita per il project. Ina gruppa da set persunas ha puspè reactivà l’idea d’in glatsch artifizial a Seglias. Quel duess pudair vegnir duvrà da glieud da l’entira regiun. Sco quai che Stefan Collet ha ditg, hajan ins a Seglias bain ina patinera natirala. L’enviern passà hajan ins pudì duvrar quella gist diesch dis. Cun tut la lavur ch’ins haja cun preparar, saja quai bler memia pauc. Ussa sperian ins da survegnir agid da las vischnancas da la regiun Viamala. Intginas hajan gia respundì la dumonda da contribuir finanzialmain. Ad Andeer è avant curt vegnì approvada ina contribuziun da 30’000 francs. La fin da quest onn vul l’uniun dal glatsch artifizial da Seglias decider, sch’il project duess vegnir realisà. La primavaira decida lura la radunanza communala da Seglias, sch’il project d’infrastructura cun gardarobas po vegnir realisà. Sche tut va tenor plan duess la patinera artifiziala vegnir realisada sin l’enviern 2025/2026. Ils custs da planisaziun, cumpra dal glatsch artifizial e la realisaziun muntan a 1,1 milliuns francs.