Las duas punts da l'inschignier Jürg Conzett en la chavorgia da la Viamala han in num: «Pùnts da tgavorgia». Suenter l'avertura da las punts cun il cumenzament da la stagiun da l'onn passà erani bain accessiblas al public. Propi in num hai però dà pir ussa. L'act da dar il num a la punt han ils responsabels da la ViamalaInfra sco societad gestiunara fatg cun aua dal Rain Posteriur.
Tuna simpel – n'èsi però betg stà
Entant che tschellas duas punts da Conzett en la Viamala portan il num da cultira, da nua ch'i stattan (Pùnt Traversina e Pùnt da Suransuns), n'è quai betg stà pussaivel tar las duas punts novas. En il conturn direct da las punts na datti nagin num da cultira. Rumantsch haja quai però stuì esser, communitgescha Viamala Turissem. Ed en collavuraziun cun la Lia Rumantscha sajan sa cristallisadas duas pussaivladads: «Pùnts soras» e «Pùnts da tgavorgia». Pervi dal tun elegant e melodic saja la giuria prest sa decidida per las «Pùnts da tgavorgia».