Il servetsch da pasts è tschertgà: L’onn 2020 ha la Spitex Viamala vendì 10’000 gentars, in onn avant sajan quai anc stads 8’000. Quai conferma Roman Stäbler, il vicedirectur da l’associaziun Spitex Grischun e mainafatschenta da la Spitex Viamala.
Uschiglio n'haja la crisa da corona atgnamain betg ina grond'influenza sin la Spitex. Bain dovria la Spitex en il Grischun actualmain dubel uschè bler persunal sco avant diesch onns. Quai n’haja dentant da far nagut cun corona. Cun la strategia actuala «ambulant avant staziunar» dettia quai dapli lavur per la Spitex.
Pliras medias han gia rapportà il davos temp, che blera glieud pli veglia spetga anc dad ir en ina chasa da vegls u da tgira. Cifras dal chantun mussan ussa, che la fluctuaziun è normala. Era la Spitex n’ha betg dapli da far pervi da corona.
Sco quai ch’il post da communicaziun coronavirus dal chantun scriva sin dumonda dad RTR, sajan ils radund 2'500 letgs da las chasas da tgira dal Grischun occupads tranter 90-93%. I dettia il mument ina normala fluctuaziun, ina gronda differenza en congual cun avant corona na saja betg d’observar. E gia avant corona na sajan er betg adina stads occupads tut ils letgs. Tge che saja auter durant corona, ch’i dovria en las chasas da vegls ed attempads chombras da reserva per quarantina ed isolaziun.