Irene Schuler, la manadra dal project, è cuntenta cun l'emprim onn dal trec. En il center saja stada la communicaziun e da far enconuschent la purschida. In emprim passa saja fatg, ins haja dentant franc er potenzial da svilup per ils proxim onns.
Grond success per purschida sin il pass dal Set
La purschida da pernottar sin il pass dal Set en l'anteriura chamona da militar renovada saja stada fitg dumandada. Qua sajan ins gia tar las cifras ch'il plan da business prevesa per en tschintg onns. En auters lieus d'etappa, che na sajan er betg uschè enconuschents tar giasts dal di e turists, sajan las cifras auter. Irene Schuler saja dentant da buna speranza che cun purschidas individualas vegn er là il success.
Evitar in overturissem
Ina sfida saja franc er dad evitar in overturissem en la regiun dal Parc Ela. Il trec na duess betg daventar in hotspot per influencers ed uschia avair consequenzas negativas per l'ambient. Cun esser dentant ina purschida er per in tant pretensiusa da viandar na saja quel privel en mintga cas er fitg pitschen.