Il Center da Sanadad Savognin SA sa distanziescha cleramain dal video, nua che lur medi conciliar infurmescha davart il sa cumportar en connex cun il coronavirus en scola.
Quest video è vegnì publitgà da Savognin Turissem senza che nus avain gì enconuschientscha da quai. Jau chat, sch’in medi vul palesar sia opiniun privata alura duai el far quai, però betg sut il num da l'ospital, nua ch’el ha lavurà.
En il fratemp n'è il video betg pli online. Era in segund video ch’è vegnì publitgà pli tard, è ussa betg pli activ. Cun il video hajan’ins vulì infurmar la populaziun sur da la situaziun dal coronavirus en la val. Quai na saja però betg gartegià, uschia ch’ins haja decidì da prender ils videos giu da la rait. Ins haja atgnamain vulì infurmar cun quels videos, e betg chaschunar malsegirtads, ha ditg Luzi Thomann il president da la Savognin Bivio Alvra Turissem SA.
Chantun accepta il video malgrà mancanzas
Vis il video ha era la media chantunala Marina Jamnicki. Schon ier ha ella ditg envers RTR ch’il medi giaja bain in pau memia lunsch cun bagatellisar e dir che tut na saja betg uschè nausch, ma el transmettia schon era ch’i na saja betg d’avair tema da murir, sch’ins entria en scola. Tut en tut possia ella acceptar il video, era sche quel na correspundia betg 100% a las recumandaziuns dal chantun e da la Confederaziun.