L'onn 2017 han Vici e Flurin Buchli surpiglià il bain puril Pro d'Alva a Scharans. Sper las vatgas mamma da razza brina originala cultiveschan els tranter auter er maila, paira, primblas, tschareschas e cudogns. Sper conservar ils fritgs a moda tradiziunala sco far confitura u schelar, laschan els era mintgatant brischar intgins liters vinars.
Preparativas
Per alura laschar brischar vinars stoppian ils fritgs vegnir mess en in butschin, declera Vici Buchli. I vegnia fatg flucs u buglia or dals fritgs, sch'i saja necessari vegni agiuntà suc da maila u aua, che la buglia saja avunda liquida. Ils fritgs stoppian esser bain madirs. Durant duas emnas stoppian ins truschar mintga segund di il cuntegn. Suenter quellas duas emnas vegn il butschin serrà. Impurtant saja ch'il butschin saja propi serrà e nagin'aria possia viaden. Ils proxims 90 dis stoppia il butschin lura ruassar.
Destillar
Ils butschins preparads van suenter ruassar sin via a Pratval tar Urs Flütsch. Sper ses manaschi da pur destillescha el dal november fin l'avrigl. Mintga butschin dovria circa duas uras, uschia ch'el fetschia quatter arsiras a di. Or da 100 kg fritgs dettia diesch fin dudesch liters vinars, quai dependi in pau dals fritgs.
Lubientscha
Per laschar far vinars dovran Vici e Flurin Buchli ina lubientscha da la Confederaziun Svizra. Tenor criteris sco per exempel grondezza dal manaschi e da la cultivaziun speziala vegni eruì quants liters ch'els pon laschar destillar. Il bain puril pro d'Alva a Scharans dastgass mintg’onn laschar destillar 22,5 liters vinars.
