Dapi diesch onns dat la firma da Filisur a fit pignols da Nadal en in vasch, ed i para da funcziunar bain. L'interess da nizzegiar quest servetsch crescha, oravant tut en las citads.
Nus dain a fit passa 4'000 pignols en vaschs durant il temp da Nadal.
Da prender a fit in pignol da Nadal haja plirs avantatgs – tranter auter ch'il pignol na perdia betg las guglias. Ed ins na stoppia betg dismetter el suenter il temp festiv. L'interess vi da quest servetsch saja cunzunt grond en las citads. Tenor Markus Schutz ha la firma clientella da tut la Svizra tudestga, dentant era en il Grischun.
Era sche questa offerta dat blera lavur ed ils transports custan, saja quai anc adina pli persistent che da cumprar in pignol taglià. Perquai ch'era quels fetschian lungs viadis. Ed igl è pussaivel da duvrar ils pignols puspè il proxim onn. La firma Schutz porscha numnadamain la pussaivladad, ch'ins survegn mintg'onn puspè il medem pignol. Ed uschia po il client u la clienta festivar cun quel Nadal e vesair dad onn ad onn, quant fitg ch'el è creschì.
