I tuna simpel - ensatgl d'in biro en la citad, pudair lavurar en ina abitaziun en las muntognas. Per il cuniniziant Thomas Degen da Maiavilla èn ils avantatgs avant maun: cumbinar viver en las muntognas e pudair lavurar per in temp limità haja per tuts avantatgs. Cun il temp da Corona ed uschia il homeoffice sajan vegnids scuverts ils avantatgs da quest modell da lavurar, il medem mument dentant er las sfidas, sco per exempel l'esser disturbà eventualmain u la mancanza d'in lieu adattà per lavurar a chasa.
«La clientella è surtut firmas ed affars» resumescha Thomas Degen l'idea. Cun porscher letgs gestiunads, sajan quai er letgs chauds e pertutga uschia betg il contingent da segundas abitaziuns. Er saja lur purschida betg ina concurrenza ad abitaziuns da vacanzas, perquai ch'il segment da prestch saja tut in auter. In'emna per exempel custa enturn 2'500 francs.
En Bregaglia pli lunsch ch'en Surses
Tenor Thomas Degen planisesch'ins talas abitaziuns er en Bregaglia. Là possian ins planisar en in zona da construcziun. A Sur en la vischnanca da Surses stuess l'emprim vegnir creada ina zona da turissem. Davart da la vischnanca hajan ins survegnì la proposta per differents lieus e sa decidì per Sur. Avant da concretisar il project, saja ussa en mintga cas d'infurmar la populaziun e da chattar investurs sin l'agenda. Tut tenor quantas unitads che vegnan construidas, quintan ils iniziants cun custs d'enfin tschintg milliuns francs.