La visiun «Tgea da Schons» cumpiglia in café ed in museum per l'exposiziun dal plafond da la baselgia Son Martin. Anc èn ils iniziants al cumenzament. Sut la batgetta da Regula Götte – l'anteriura presidenta communala ed actualmain presidenta da la fundaziun plafond baselgia Son Martin – èn vegnids fatgs ils emprims pass.
La Cuminanza Culturala Val Schons – actualmain la possessura da la Tgea da Schons – è pronta da surdar il bajetg per in franc simbolic ad ina fundaziun nova. Cun quai saja l'emprim obstachel surmuntà. La nova fundaziun sto dentant anc vegnir fundada. Ins quinta cun custs da circa quatter milliuns francs.
Il motto per il nov center cultural saja: «Turnar en vischnanca». La via fin là è dentant anc lunga. In proxim pass saja, da chattar soluziuns acceptablas cun ils vischins. La primavaira 2023 duess lura vegnir lantschada ina concurrenza d'architectura. Sche tut va tenor plan, pudess tut esser pront il 2025.