Èsi giustifitgà ch'il Museum d'art a Cuira ha dus schefs che custan dapli senza ch'i dettia dapli lavur? Quai è il deputà da la PPS Roman Hug sa dumandà oz en la ura da dumondas dal Cussegl Grond e cuntinuescha cun quai ina discussiun, ch'el ha gia lantschà en la sessiun da december el rom dal budget. Gia lura ha el crititgà, ch’ina instituziun chantunala haja simplamain installà dus schefs che custan dapli. Nov fieu ha la discussiun survegnì pir dacurt cura che las cifras da visitaders èn vegnidas preschentadas. Il dumber da visitaders è numnadamain sa reducì durant l'onn passà per bunamain in terz en cumparegliaziun cun l'onn avant. Roman Hug na vesa uschia anc pli pauc la giustificaziun d'avair ina co-direcziun.
Il nov directur dal departament per cultura, Jon Domenic Parolini ha menziunà en sia resposta, ch'el vul laschar analisar la situaziun, quai ha el empermess oz en il rom da l'ura da dumondas dal Cussegl Grond.
RR novitads 12:00