Las regiuns talianas en il Grischun dal Sid è duain survegnir ina meglra purschida da medias. La purschida taliana saja en il chantun Grischun actualmain pli modesta che la rumantscha e tudestga. Perquai ha la regenza dà glisch verda a dus projects correspundents. Per realisar ils dus projects èn planisadas mintg'onn contribuziuns chantunalas da 220'000 francs. Ultra da quai sa participescha la Confederaziun en il rom vertent als projects, quai sut il titel da mantegnair e da promover finanzialmain las linguas minoritaras.
Projects per ina meglra purschida da medias
- Ina nova plattafurma digitala «E-Grigionitaliano»
In project è da crear ina plattafurma digitala per parter cuntegns schurnalistics sur las valladas «E-Grigionitaliano». Quai en collavuraziun cun l'uniun InfoGrigione.
- Augment dal «Servizio Valli Italofone» tar la SDA
Ultra da quai vegn la plazza dal Servizio Valli Italofone tar l'agentura da novitads Keystone-SDA a Cuira augmentada da 50 sin 100%. A partir dal 2026 duain lura anc ina giada vegnir vitiers 60%.
Keystone-SDA mantegn sco fin qua tant la responsabladad publicistica sco er la gestiun dal dretg da persunal da las collavuraturas e dals collavuraturs. Il post da redacziun da lingua taliana tar Keystone-SDA è vegnì installà l’onn 2017 per incumbensa dal chantun Grischun e vegn finanzià sur la promoziun da linguas da la Confederaziun e dal chantun.