140 kilos cocain han las autoritads chattà en ils chantuns Glaruna, Grischun, Son Gagl e Tessin. Las drogas eran zuppadas en stgatlas da bananas. Las stgatlas da bananas sajan vegnidas chattadas en las filialas d'in grossist, ha la Procura publica federala confermà envers la pagina d'internet «20 Minuten».
Il cocain derivia d'ina furniziun ord ils Pajais Bass e vegnia oriundamain da l'America dal Sid. Tenor «20 Minuten» èn pertutgadas filialas dal Coop. Las drogas chattadas han ina valita da plirs milliuns francs.
Cunquai che plirs chantuns èn involvids, vegn la Procura publica federala a s'occupar da la procedura che vegn manada cunter nunenconuschent pervi da cuntrafar a la lescha davart nacotics. Dapli indicaziuns n'ha la Procura publica federala anc betg fatg.