Sin la dumonda schebain las Alps èn vegnidas pli privlusas ils ultims onns, dat il geoinschigner a la Scola auta tecnica da Aachen Florian Amann, ch'è sta referent al Geoscience-meeting a Tavau, ina resposta plitost generala:
Las Alps han culms, e nua ch'i ha culms datti scarpas. E cunquai ei instabilitad pussaivla.
Er il fisicher Lorenz Meier da Geopraevent agiunta, che las Alps na sajan forsa betg vegnidas pli privlusas, mabain che la vista dal carstgaun saja sa midada:
Accidents en la natira na vegnan betg pli acceptads tant sco pli baud.
Annette Menzel da la Scola auta tecnica a Minca ha dentant chattà ina decleraziun persuenter, che las Alps – ubain almain ina pitschna zona en las Alps – èn forsa tuttina daventadas in zic pli malsegiras. En lieus nua che la schelira permanenta sdreglia, stoppia la vegetaziun teoreticamain sa mover ensi, per puspè segirar quels lieus, ha ditg Menzel. Consequentamain constatescha Menzel in different tempo dal svilup:
Il guaud na crescha betg uschè svelt sco quai che la midada dal clima dat avant.
RR actualitad 08:00