A la chatscha da quest onn duain vegnir sajettads tut en tut bunamain 5’300 tschiervs, da quels bun 3'000 animals feminins. Quai ha communitgà la regenza. La chatscha da chamutschs e da chavriels vegnia ad avair lieu en la gronda part da las regiuns analog a l'onn passà.
La ferma reducziun da la populaziun da chavriels e da chamutschs en territoris da trieps da lufs e dal luf-tscherver vegnia resguardada quest onn anc pli fitg cun restricziuns. Concret vegnia en tschertas regiuns franada la chatscha d'ansiels-chavriel durant la chatscha auta, uschia per exempel en Surselva ed en il Grischun Central.
Ensemen cun il luf-tscherver – è il luf responsabel per damain chamutschs e chavriels en las regiuns Surselva, Rain Posteriur, Mantogna e Grischun Central. En las ulteriuras regiuns èn ils dumbers dentant anc adina mesauns enfin auts. Ina chatscha suffizienta da chauras ed ansiels gidia là a la situaziun da la selvaschina e dal guaud, di il chantun. La chatscha sin quels è prevesida durant ils ultims quatter dis da la chatscha auta.
