Grischun - Lai dat gas

Lai ha fatg in grond svilup

Avant diesch onns era Lai anc ina mediocra regiun da turissem quai che pertutga gronds eveniments. In sguard enavos sin il 2006 mussa che la regiun n'aveva strusch eveniments da gronda muntada. Il campiunadi svizzer da biatlon ed ina cursa internaziunala da chauns da schlitta tutgavan tar ils puncts culminants da l’enviern 2006.

Il 2016 è la Tour de Ski stada sin visità, la segund auta liga da biatlon ha fatg cursas a Lantsch ed era la cuppa mundiala da las dunnas alpinas ha gì lieu a Parpan. Cun cursas da mountainbike e downhill la stad vegn in program cumplettà. Cun la colliaziun dal territori da skis Lai-Arosa han ins pudì far in ulteriur grond pass. Era il portal dal territori da skis a Churwalden è vegni realisà. La glista dad innovaziuns è daventà lunga.

Betg dapli mabain megliers eveniments pel futur

Roland Anderegg è expert da turissem e docent a la HTW Cuira. Er el conferma che Lai ha fatg in grond svilup ils ultims onns. Ins sappia propi discurrer d’ina istorgia da success. Dentant na po la purschida ussa betg crescher enavant sco ils ultims onns. Quests eveniments dovrian numnadamain ina massa voluntaris e natiralmain era testas ch'èn prontas dad organisar tals eveniments. Quai èn ins tenor Anderegg bainbaud al cunfin.

Tge che saja ussa impurtant è da pudair perfecziunar ils eveniments, uschia che quests eveniments existents restan era segir en la regiun da Lai. Quai na vegli dentant betg dir ch'ils eveniment organisads na sajan betg stads buns. Il cuntrari: Il Tour de Ski a Lantsch è vegnì ludà en ils pli auts tuns. Vitiers vegn l’infrastructura cun la nova chasa da biatlon ussa era anc ina giada optimà.

L’avantatg è che la regiun da Lai sto lavurar ensemen

L’expert da turissem punctuescha dentant era adina puspè che Lai na saja betg l’unica regiun da turissem en Grischun che dettia gas. Lai haja simplamain pudì far il pli grond svilup cunquai ch'els n’avevan anc betg propi grond eveniments. San Murezzan per exempel haja gia dapi onns la cuppa mundiala dals alpins, cursas da bob e skeleton u era il White Turf. Era Tavau po dapi onns generar dapli pernottaziuns cun cursas da la cuppa mundiala da passlung, il WEF u er la Cuppa Spengler. Tenor Anderegg lavuran tut las grondas regiuns turisticas dal Grischun bain, betg mo Lai.

In avantatg che Lai haja dentant envers ils auter lieus è ch'ins è avunda grond per eveniments impurtants, dentant mo sche tuts lavuran ensemen en la regiun. Uschia èn tuts cuntents da survegnir in toc da la petta e n'han betg tema che l’auter pudess survegnir in toc pli grond. Quai problem e cumbat è conuschents tar las regiuns pli grondas nua che mintgin fa pli gugent insatge pitschen per sasez enstagl da far insatge grond ensemen e lura parter il gudogn. A Lai n'è quai betg il cas. A Lantsch han lieu las occurrenzas nordicas, a Parpan èn las cursas d’alpin ed a Lai è il center.

Per il futur spera Roland Anderegg ch'ins optimeschia ils eveniments existents enstagl da crear ulteriurs eveniments en la regiun, quai en favur da las resursas limitadas en la regiun e per la qualitad dals eveniments.