Sco quai che Giochen Bearth, il manader da l'Uffizi per la segirezza da victualias e per la sanadad d’animals ha ditg envers RTR, saja la qualitad da l’aua en lais Grischuns nua ch’ins po far bogn, buna. In monitoring che vegnia fatg il mais d’avust na mussia nagins indizis, ch’i dess lais ch’èn contaminads cun algas blauas. Quest monitoring vegn publitgà vers la fin da l’avust.
L’onn passà han tut ils 22 lais Grischuns ch’èn vegnids controllads cuntanschì la nota A (fitg bun, betg da quintar cun problems da sanadad pervi da l’aua da far bogn en lais), u B (bun). Tenor Bearth mussan quests tests dentant adina be la situaziun mumentana. La fin finala stoppia mintga nudadra e nudader validar sez u sezza, sch’in lai saja schuber avunda per nudar. Fasas chaudas pli lungas possian spert midar la qualitad da l’aua da far bogn en ils lais, ha ditg Bearth.
