Oriundamain era l'Inner Wheel Club in tschertgel da dunnas dals Rotariets, il pendent masculin. Il logo da l'uniun mussa la roda endadens dals Rotariers.
1924 è l'uniun dad Inner Wheel vegnida fundada en l'Engalterra – quai or dal motiv da tgirar la cumpagnia e s'engaschar sin camp caritativ. Oz è l'Inner Wheel Club daventà la pli gronda uniun da dunnas independenta cun 3'908 clubs sin l'entir mund.
Il Club Inner Wheel Rätia ha il scopo da tgirar amicizia, solidaritad e la communicaziun internaziunala – tranter autras naziuns – ma era regiuns en Svizra.
L'Inner Wheel Club Rätia è vegnì fundà avant radund 20 onns. Natalia Gliott è commembra dapi 8 onns.
Cura ch'jau hai vis tge finamira che questa uniun ha per propi, cun sustegnair chaussas socialas, sun jau ma decidida d'entrar en quest club. Jau crai che quai engaschi social giascha a nus dunnas uschè u uschia fitg a cor.
Las instituziuns che l'uniun sustegna finanzialmain resguardan il Grischun, la Svizra – ma er l'exteriur. Sin il camp regiunal è quai la Casa Depuoz, la fundaziun Scalottas, la chasa per dunnas a Cuera e l'uniun MOMO.
Sin intschess naziunal, la fundaziun dad ALS – ed internaziunal l'Ospital d'Albert Schweizer a Haiti.
Las commembras da l'uniun s'inscuntran duas giadas il mais a Cuira – ina giada è quai en furma d'in aperitiv, nua che l'esser da cumpagnia giascha en il center.
Igl è impurtant da savair ch'ins ha ina rait ch'ins sa sa discurrer – era lura cura ch'i na va betg uschè bain cun ins.
Sper l'aperitiv, datti ina giada il mais ina s'entuppada nua che las dunnas visitan instituziun socialas, culturalas u prendan part a referats tar differents temas.
Damaun ils, 9 da mars 2019 sa preschenta l'Inner Wheel Club en la Via dalla staziun a Cuira e rimna uschia daners per donaziuns, per uschia sustegnair las instituziuns.
RR actualitad 08:00