La Regenza grischuna ha approvà la revisiun parziala da l'Ordinaziun davart las vias dal chantun Grischun. Entras la revisiun pon vegnir pajadas pli autas contribuziuns chantunalas per vias da velo, tant dal traffic quotidian sco dal traffic da temp liber, sco er per sendas da viandar. Quai communitgescha il chantun.
Da nov po la contribuziun chantunala esser fin ad 80% dals custs sch'ina via da velo dal traffic quotidian è d'interess chantunal «predominant». Er vias da velo dal traffic da temp liber e sendas da viandar duain survegnir in sustegn finanzial pli grond. Uschia po la contribuziun chantunala esser fin a 60% sche las vias correspundan ad in «interess chantunal predominant» u sch'ellas gidan a separar il traffic.
La regenza metta plinavant a disposiziun gratuitamain l'infrastructura stradala chantunala per stabiliments che produceschan energias regenerablas a las vischnancas, societads dal provediment d'energia ed a las interpresas instituziunalas.
