Grischun Vacanzas - «L'enviern ha cumenzà cun grond success»

140 turistichers, politicras e persunas da la cultura ed economia eran preschents a l'apéro tradiziunal da Bumaun da Grischun Vacanzas. «Ils dis da festa èn stads in grond success per il Grischun», è il fazit dal president Jürg Schmid. Tenor ina retschertga actuala da las destinaziuns da sport d'enviern en il Grischun saja il dumber da giasts stà pli aut sur ils dis da festa il 2024/25 che l'onn avant.

Tenor Jürg Schmid saja il Grischun cun gronda distanza la destinaziun da vacanzas preferida per Svizras e Svizzers. Da l'aura sulegliva hajan tenor la communicaziun tuts dal turissem profità: Ils hotels en las regiuns da vacanzas sajan per exempel stads occupads ed era la Viafier retica haja nudà in'auta frequenza tar ils trens.

Convivenza tranter persunas indigenas e turists

Surtut durant las vacanzas – tranter Nadal e Bumaun, il favrer e la stad durant quatter emnas – èn blers giasts en il chantun Grischun. Las vias da las regiuns turisticas èn lura mintgamai emplanidas, avant il Vereina èsi da spetgar pliras uras ed en bus e trens ston ins per part star en pe. Tenor Nora Saratz Cazin – presidenta communala da Puntraschigna – saja l'atmosfera durant quai temp da stagiun auta per gronda part buna. Sco indigen sappian ins per exempel, ch’ins n'è betg ideal ir a cumprar en ils 26 da december.

Era il directur da Grischun Vacanzas, Martin Vincenz, s’adattia durant il temp turistic e na giaja betg sin pista tranter Nadal e Bumaun. Uschè lunsch ch’ins possia anc dumbrar quests dis emplenids vi da in u dus mauns, alura na saja quai nagin problem. Sch'il Grischun fiss permanentamain uschè plain stuess ins far insatge, manegia Martin Vincenz. Actualmain po il Grischun prevegnir in pau, per exempel cun reparter ils events pli gronds sin diversas datas u sustegnair la communicaziun tranter las persunas indigenas e las persunas ch'arrivan regularmain en il Grischun per far vacanzas.

Il 2025 spetgan gronds eveniments da sport

Sper la bilantscha dal 2024 ha l'organisaziun tetgala dal turissem grischun era dà in'egliada enavant ed infurmà la branscha tge che spetga il 2025. Questa stagiun d’enviern dastga il Grischun beneventar dus eveniments gronds da sport – per l’ina cumenza a Lai ils 11 da favrer il campiunadi mundial da biatlon e per l'autra suonda ils 17 da mars il campiunadi mundial da freestyle en l'Engiadina ed a San Murezzi.

A partir dals 19 da settember suondia lura a Lai il campiunadi mundial da mountainbike. Il profi Nino Schurter – ch'è ambassadur per Grischun Vacanzas – ha infurmà a l'apéro che quai pudess esser la davosa stagiun ch'el sa participescha ad in campiunadi.