Il vicecumandant Gianfranco Albertini vegn a bandunar la Polizia chantunala dal Grischun per il cumenzament da l'onn proxim. Quai scriva il chantun. Il motiv per quest pass sajan differenzas persunalas e tematicas insuperablas cun il cumandant Walter Schlegel.
Nus avain vis che nus avain ina situaziun difficila. Nus avain analisà quella ed empruvà da chattar ina schliaziun cun la quala tuts san viver.
Pervia da questa situaziun vegn Gianfranco Albertini a remetter sia funcziun directiva gia questa stad. Durant il temp restant vegn l'um da 59 onns a star a disposiziun per projects surchantunals sco er per l'ediziun d'ina versiun taliana dal commentari tar la Lescha grischuna da polizia e per scolaziuns en quest connex.
Tenor Peter Peyer saja uss er impurtant da tgirar las plajas che la collavuraziun tranter Albertini e Schlegel hajan chaschunà intern, ma er da chattar ils sbagls ch’il departament haja fatg. Per uschia evitar da quellas situaziuns, per che la Polizia possia sa concentrar sin sia lavur primara.
Regenza deplorescha quest svilup
Cun Gianfranco Albertini bandunia ina persunalitad cumprovada cun reputaziun naziunala la Polizia chantunala. Durant set onns è Gianfranco Albertini stà inquisitur tar la Procura publica, dapi 22 onns schef da la Polizia criminala e sco ultim vicecumandant da la Polizia chantunala dal Grischun.