Siglir tar il cuntegn
Inhalt

Grischun Grond chantun cun gronda varietad

En Grischun datti ina gronda biodiversitad. Quai cunzunt perquai ch'il chantun è uschè varià. La biodiversitad sa sviluppa dentant era vinavant.

Erva ed in pèr flurs.
Legenda: Erva ed in pèr flurs. RTR, Flurin Clalüna

En il Grischun datti ina pluna sorts d'animals e da plantas. Quai surtut perquai ch'il chantun ha cuntradas fitg differentas: Muntognas, ognas, regiuns pli bassas – ins chatta tut, di il responsabel per biotops e protecziun d'animals da l'Uffizi per la natira e la cuntrada dal Grischun, Luis Lietha. I dat però er bleras razzas periclitadas. Da tut ils passa 3'000 animals sin la glista cotschna – pia ils animals periclitads – èn bunamain la mesadad era derasads en Grischun.

Monitoring da diversitad

L'Uffizi federal d'ambient fa en l'entira Svizra in uschenumnà monitoring da biodiversitad. Biologs u botanicras sco Dunja Al Jabaji dumbran en divers lieus las plantas e piglian provas da la terra. Uschia vulan els tegnair en egl la varietad da razzas en l'entira Svizra.

Il monitoring da l'Uffizi federal d'ambient dat ina survista generala. Ma era ils uffizis chantunals fan ina sort monitoring. Els na controllan però betg l'entira surfatscha. Els dattan egliadas pli detagliadas sin singuls lieus sco biotops ubain sin singulas gruppas d'animals.

RR Actualitad 07:00