Sia giacca verda – che sumeglia fitg ina giacca da protecziun da lavurers da construcziun – splendura prest sut il tschiel grisch e nivlus da questa damaun. Heidi Günthart è manadra da viandar e maina questa davosa viandada da l'onn. Ina gronda part da las participantas èn dunnas, ma igl ha er in u l'auter um en la gruppa. En maun ina camera digitala u channa da viandar.
Ils seniors taidlan cun attenziun quai che la manadra cun il chau plain rollas raquinta, ma blers egls tatgan vi da la gronda funtauna da lain da l'autra vart da la via. Questa funtauna occupa l'entira plazza. Ed il pli spezial è la figura d'ina nixa che stat sissum. Cun questa nixa cumenza gist l'emprima part da la spassegiada – Heidi Günthart ha numnadamain organisà ina visita guidada tras il vitg!
Per quai viv jau. Ils davos dus onns hai jau stuì tegnair enavos in pau las viandadas, perquai che jau hai fatg ina scolaziun. Ma ussa sun jau puspè enavos.
Regula Ragetti è copresidenta da l'uniun «Valendas Impuls» – e cun in ordinatur plain infos e fotos maina ella la gruppa tras il vitg. La gruppa è interessada, e Heidi Günthart accumpogna ella cun sia giacca che dat en egl e discurra adina puspè cun la glieud. «Quai è mes sang dal cor», di ella. «Per quai viv jau.»
-
Bild 1 von 2. Il pli grond bigl da l'Europa – e la partenza da la guida tras Valendau. Bildquelle: RTR.
-
Bild 2 von 2. La gruppa è interessada – malgrad la nebla e las temperaturas bassas. Bildquelle: RTR.
La guida Regula Ragetti maina sur vias veglias fin tar ina pigna antica amez il vitg da Valendau – cun in esch uschè bass, che tuts ston trair aint il tgau cun entrar.
Basta ch'ins saja en gruppa
E las participontas paran da sa sentir bain en questa runda, sco els ed ellas raquintan. «En gruppa fa quai grond plaschair», di Heidi Tomaschett da Mustér. Ella stat dapi 30 onns en Surselva ed ha emprendì rumantsch. Ed ella va bler cun la gruppa da viandar da Pro Senectute a viandar.
Suenter la guida sa metta la gruppa sin via tar l'ustaria Bargaus a Laax. Quant impurtanta che quella gruppa da viandants è per Heidi Günthart sent'ins er, cura ch'ella declera, pertge ch'ella ha tschernì questa ustria. «Avant dus onns sun jau stada qua ina giada. E cura che jau hai vesì l'ustaria, hai jau immediat telefonà a mes collegas da guid da viandar e ditg: Jau fatsch la proxima giada la spassegiada finala! Jau vuless ir precis en questa ustaria cun la gruppa!»
En gruppa fa quai grond plaschair da viandar – per mai èsi d'ina vart la communitad, e da l'autra vart da vesair insatge nov.
Punctual a las 12:00 èn tuts tar l'ustaria Bargaus a Laax. Duas grondas maisas èn reservadas per la gruppa. Suenter la spaisa principala stat la manadra Heidi Günthart en pe, en fatscha ina gronda risada. La giacca verda è ussa sin la sutga. Ella engrazia a tuts – als commembers, als auters manaders da spassegiadas ed a l'ustaria.
Proxima primavaira cuntinueschi lura puspè cun viandadas pli lungas e stentusas, ma oz èsi il pli impurtant da mangiar insatge bun e da giudair cuminaivlamain il temp.