In bogn ch’è renumà per sia aua frestga è il bogn Sand a Cuira. Il bogn istoric en la citad veglia ha bler sumbriva, uschia che l’aua na po betg sa stgaudar, quai di hai mo 20 grads.
Differenza tranter la temperatura d’aria e quella da l’aua
Il bogn a Tusaun è pulit chaud cun 24 grads. Cunquai che l’aria è dentant in toc pli chauda, resentan ils giasts l’aua sco fraida, declera il guardiabogn.
Stgaudar l’aua per prolungar la stagiun
A Glion vegn l’aua stgaudada cun agid da forza solara e cun chalira a distanza. Cunquai ch’il bogn sa chattia en ils culms, en las alps, saja quai necessari da stgaudar, declera Aziz Cheikh, il manader da gestiun dal bogn. Las maschinas procuran per 24 grads, il rest fa il sulegl, quai di datti 27 grads.
Differentas strategias en l’autezza
Pany e Churwalden èn omadus sur 1’200 meters. A Pany stgauda il sulegl l’aua sin 23 u dapli grads, il panorama è fenomenal. Stgaudar l’aua na fiss nagina opziun, pervi dals custs, di il guardiabogn Beatrice Widmer. L’aua a Churwalden fiss memia fraida, uschia ch’ella vegn stgaudada, oz sin 25 grads. Quai custa dapli che quai ch’i porta entradas.
La temperatura ideala per far bogn è tranter 23 e 27 grads, e sche l’aria è bler pli chauda che l’aua, dovri in zic surventschida e suenter pon ins simplamain giudair il frestg.
RR actualitad 12:00