Cun la gulivaziun da finanzas 2026 en il chantun Grischun survegnan las vischnancas grischunas dapli daners en lur cassas. Ils var 71,8 milliuns francs che stettian a disposiziun, sajan 8,6% e cunquai 5,7 milliuns dapli che quest onn, communitgescha il Departament da finanzas e vischnancas. Da quests 71,8 milliuns francs surpiglian las vischnancas fermas 30,5 milliuns francs, il rest finanziescha il chantun.
La gulivaziun da finanzas sa basa sin l'uschenumnà potenzial da resursas da las 100 vischnancas dal Grischun che sa cumpona da taglia e tschains.
Sin basa dal potenzial total vegn calculada la media per persuna che correspunda lura a 100 puncts en l'index. Questa media munta per l'auter onn a 4'461 francs. Sur questa limita èn 39 vischnancas che contribueschan lur part a la gulivaziun, e sut 100 puncts èn 60 vischnancas che profiteschan da la gulivaziun. Ina vischnanca (Conters en il Partenz) è exact tar 100 e resta neutrala.
En tut valan pia 60 da las 100 vischnancas grischunas sco flaivlas cun resursas. Tuttina è il potenzial sur l'entir chantun creschì.
Questa creschientscha attribuescha il Departament da finanzas a las vischnancas fermas che creschan. Uschia saja era la differenza tranter la pli flaivla (45,6 puncts) e la pli ferma (463,6 puncts) creschida. Entant che la pli flaivla è restada tar ils 45,6 puncts, è la pli ferma creschida da 372,5 puncts a 463,6 puncts.
Gulivaziun per grevezzas extraordinarias
Per gulivar las grevezzas alpinas e da scola, pon vischnancas dumandar contribuziuns extraordinarias tras dischavantatgs geografics-topografics, u era tras la quota da scolaras e scolars. Qua retschaivan l'auter onn 51 vischnancas en tut 29 milliuns francs. Quai èn daners che na vegnan betg ord la gulivaziun da finanzas, mabain ch'il chantun Grischun finanziescha cumplainamain sez.
La pli gronda summa retschaivan qua sco l'onn passà era las vischnancas da la regiun Surselva e dal Partenz / Tavau.
