La fundaziun per il gimnasi da sport da Tavau survegn sustegn dal chantun per engrondir la halla da sport Färbi, la basa da trenament da Swiss-Ski. La contribuziun dal chantun munta a maximalmain 1,5 milliuns francs. Quests daners conceda la regenza per l'ina perquai che la halla vala sco «infrastructura relevanta per il sistem» e per l'autra perquai che l'implant da sport è d'impurtanza naziunala, scriva la regenza.
Halla per sportists d'elita
Sco igl ha num en la communicaziun da la regenza è la halla multifuncziunala in'infrastructura centrala per il sport d'elita (basa da trenament da Swiss-Ski), per la promoziun da sport da talents giuvens (gimnasi da sport Tavau). Suenter la renovaziun porschia la halla in'infrastructura d'atletica spezialisada e topmoderna, uschia la communicaziun. La halla po er vegnir duvrada da persunas indigenas e da giasts che fan sport en lur temp liber.
RTR novitads 12:00