Di per di vegnan da quai da 150 apparats da respiraziun producids a Domat. Il plaz da producziun, ils magasins per material ed infrastructura vegnan plaunet stgars.
Las empustaziuns èn anc adina fitg autas.
Las empustaziuns actualas vegnan oravant tut da l'America dal Sid, da l'Asia e pajais arabs. Ina empustaziun pli gronda saja vegnida da la regenza da l'America. Ina incarica d'ina mesa milliarda, per quest motiv è vegnì creà ils davos mais ina halla da producziun a posta en l'America. Là èn 200 novs collavuraturs ussa vid la lavur, els han da construir 25'000 apparats.
Dentant era en il Grischun hai dà ils davos mais 200 fin 300 plazzas novas, per part era plazzas temporaras. Uschia è era Mihel Kreiliger vegnids a lavurar tar la Hamilton Medical a Domat. El aveva abditgà sia plazza per ir a viagiar. Lura è corona vegnì tranteren ed el ha prendì la chaschun da lavurar temporar vid las maschinas da respiraziun. Il viadi sto spetgar sin l'auter onn.
Andreas Wieland di che la Hamilton Medical haja gia cuntanschì ussa la svieuta da l'onn passà. Quest onn vegnia in onn sensaziunal en quest reguard e quai oravant tut grazia a ses collavuraturs che hajan lavurà da di e da notg.