Ils 31 d’avust ha Hannes Jenny gì ses ultim di da lavur, uss è el pensiunà. Precis dus dis avant che la chatscha cumenza.
Quest onn vom jau uschè luc a chatscha sco ils ultims 40 onns segir betg.
Chatscha era per il biolog da selvaschina in dals temas principals. El di, ch'ins na possia betg adina far endretg a tut ils 5’000 chatschaders e chatschadras dal Grischun. Pia hai mintgatant era dà critica – era sin livel persunal.
I vegn dischagreabel sche la famiglia vegn vidlonder.
I saja en urden sche las opiniuns èn differents e sch'igl è objectiv. In grond tema durant ils ultims onns è stà il luf – stan actual datti 12 trieps sin il territori dal Grischun. Questas istorgias sajan stadas fitg interessantas per l'uffizi, cunquai ch’els han betg fatg quint ch’els fan anc questa experientscha. L'onn 1999 èn els vegnids incumbensads da crear ina gruppa da lavur per elavurar ina strategia per la suandanta dumonda: Tge far sche animals da rapina gronds arrivan en Grischun?
Ils Bernais han pudì divider lur savair culs lufs-tscherver e quels da las Abruzzas lur experientscha cun ils lufs ed urs. Uss, 24 onns pli tard, survegn l’uffizi adina puspè telefons dals stadis cunfinants che dumondan sco ch’il Grischun fa quai cun sajettar lufs.
Per 30 onns era Hannes Jenny il substitut manader da l’uffizi, pia betg en la posiziun il pli davant.
Igl è segir pli patgific dad esser il numer dus – e sco biolog da selvaschina sun jau pli gugent en la lavur spezialisada che en la lavur politica.
E cun in surrir di il frestg pensiunà, che ils ultims 10 mais aveva el il schef il pli difficil da sia carriera – numnadamain sasez sco manader ad interim.