Siglir tar il cuntegn

Grischun Hans Peter Michel - fin ussa il topcandidat da la PLD

La Partida liberaldemocratica dal Grischun ha preschentà sias glistas per il cumbat electoral.

Hans Peter Michel.
Legenda: Hans Peter Michel. RTR, M. Decurtins

La glista liberala vegn timunada da l'anteriur president dal Cussegl grond, Hans Peter Michel. Lura succeda la suppleanta Karin Niderberger avant Urs Cadruvi, il secretari general da la Lia Rumantscha. Sin posiziun 4 è la deputada Vera Stiffler e sco ultim il deputà Maurizio Michael.

Glista «economia»

A la testa da la segunda glista, la glista «economia» è la deputada Angela Casanova avant il deputà Michael Pfäffli. Terz è il deputà Christian Kasper avant la giurista Raphaela Holliger da la PLD giuvna. Sco ultim è nominà il deputà Rudolf Kunz.

La terza glista vegn nominada pli tard da la PLD dals giuvens.

Plinavant ha la PLD grischuna nominà il Cusseglier dals chantuns d’enfin uss, Martin Schmid.

Purtret dad Urs Cadruvi, secretari general da la Lia Rumantscha.
Legenda: Urs Cadruvi. Keystone

Mintga Rumantsch a Berna è in gudogn

Il secretari general da la Lia Rumantscha, Urs Cadruvi, candidescha per la Partida liberaldemocratica per in sez en il Cussegl naziunal. Da crair da vegnir elegì quest october fiss in’illusiun sco quai che Urs Cadruvi ha ditg ad RTR. Tut tenor tge resultat ch’el fetschia, pudess el dentant schon s’imaginar da vulair ir a Berna. Pertge mintga vusch supplementara che la Rumantschia haja a Berna saja ina gudogn.

La radunanza da nominaziun dals candidats per il Cussegl naziunal è ils 7 da matg a Cuira.

RR novitads 18:00