Siglir tar il cuntegn
cuntegn

Grischun Hartmann & Cie banduna l'uniun d'impressaris dal Grischun

L'uniun na represchentia betg bain avunda las interpresas, i manchia l'elan e l'uniun haja mussà memia pauc engaschament cunter l'iniziativa da segundas abitaziuns. Quai èn tenor Markus Testa da la Hartmann & Cie las raschuns principalas tar la sortida.

Legenda: Guardar il video Hartmann banduna l'Uniun d'impressaris grischuns. Durada 02:06 minutas.
Or da sil punct dals 20.07.2018.

Mo surtut las finanzas giogan ina impurtanta rolla. L'interpresa da construcziun da San Murezzan po tenor Markus Testa spargnar grazia a la sortida da l'uniun mintg'onn radund 200'000 francs. Quai entras il respargn dal daner da commembranza e da contribuziuns d'AVS pli bassas tar in'autra cassa.

Markus Testa da la gruppa Hartmann.
Legenda: Markus Testa da la gruppa Hartmann ha decidì da sortir da l'uniun. RTR

Uniun d'impressaris perda ina da las grondas interpresas

Il president da l'uniun d'impressaris dal Grischun, Markus Derungs, deplorescha la decisiun da la firma Hartmann. Els vegnian la fin d'avust a seser ensemen e discutar, era cun l'uniun d'impressaris svizra.

Cun la grondezza da la Hartmann & Cie, cun radund 600 collavuraturs, pajava quella ina contribuziun annuala substanziala ord vesta da l'uniun d'impressaris. Perquai saja la sortida ord vesta finanziala remartgabla per els, uschia ha Markus Derungs prendì posiziun per scrit envers RTR. Tuttina possian els vinavant salvar la qualitad da lur servetschs.

RR novitads 12:00