Herbert enconuscha quasi tuttas turas da mountainbike en il Grischun, è stà giast en bunamain mintga hotel ed el enconuscha tuttas purschidas ed occurrenzas per ils amis dal mountainbike en il chantun. Herbert n'è dentant betg ì sez cun velo u ha pernottà en tut ils hotels, pertge Herbert na datti atgnamain betg. El è ina persuna inventada, in camarat da viadi virtual per ils fans da mountainbike. Herbert stat per la plattafurma nova d'infurmaziun cumpletta per ils amis da mountainbike. In'idea da l'interpresa Swiss Sports Publishing GmbH da Tavau.
Da «Flow Country» a «Herbert»
Cumenzà ha tut gia avant in temp sut il titel da lavur «Flow Country Graubünden». Per il bab spirtal da l'idea e mainagestiun da l'interpresa, Thomas Giger, èsi stà cler, ch'i dovria in'auter titel. «Nus avain tschertgà insatgè frestg, insatgè nov. Turissem è ina fatschenta da pievel, e nus avain vulì crear ina persuna. Sco num avain nus elegì Herbert», raquinta Giger.
Purschida cumplessiva
Il portal Herbert, il link avra en ina nova fanestraavrir en il browser cumpiglia tuttas purschidas da mountainbike en il Grischun ch'ins po lu era gist reservar. Integrads en la pagina èn ils hotels da bike grischuns, ina gronda rimnada da turas (singletrails), cartas e cudeschs da mountainbike u ditg curt: tut quai ch'ils adherents da quest sport dovran per far lur turas en il Grischun. Herbert è dentant er in blogger e raquinta da tut quai che capita en il Grischun davart la scena da mountainbike.
430'000 francs dal chantun
L'idea d'ina rait da purschidas e cumpetenzas per mountainbikers ha era persvadì il Cussegl da turissem dal Grischun. Lez ha lura proponì a la regenza grischuna da sustegnair il project, che custa en total radund 3,5 milliuns francs, cun daners ord il program da turissem 2014 - 2021. «Herbert» survegn dal chantun en total 430'000 francs repartgids sin 4 onns. Sco pitschna firma dovrian els la contribuziun dal chantun per pudair pladir persunas che gidan da laschar nescher e sviluppar «Herbert», di Giger.
Tematicas han in grond potenzial en il turissem. Era ir cun skis, passlung u viagiar fissan tematicas ch'ins pudess trair a niz. En l'avegnir è quai pli impurtant che regiuns u destinaziuns.
Ils 16 da mars, gist il di dal num da Herbert, va il portal herbert.bike, il link avra en ina nova fanestraavrir en il browser online, e la fin da mars vegnan publitgadas las pli novas purschidas, tranter auter ils «hammerdays» u il «Circolino-Bicicletta» a Flem, in festival da mountainbike per famiglias. L'interpresa Swiss Sports Publishing lascha ussa l'emprim nescher e crescher il mountainbiker Herbert. Sche Herbert survegn lu in di fargliuns per auters sports (skis, passlung, viagiar) saja anc avert, di Thomas Giger.
Portal ed ina revista
Sper la pagina d'internet datti era anc ina revista, in magazin da Herbert, che vegn edì mintgamai il december. Tenor Thomas Giger veglian els uschia mussar als giasts gia l'enviern, quant bella la cuntrada grischuna è duront la stad.