Per ils fans da la Cuppa Spengler vegni pli simpel da visitar ils gieus cun il traffic public si da la Bassa.
La Südostbahn maina da nov la notg in tren spezial da Landquart fin a Turitg, sco ils organisaturs da la Cuppa Spengler scrivan. Da Tavau a Landquart maina sco fin ussa la Viafier retica ils fans da hockey gratuitamain. A partir da là pon ils passagiers e las passagieras midar sin il tren spezial fin a Turitg. Ils bigliets per quai tren san vegnir retratgs en la butia d'internet da la Südostbahn. Els custan pauschal 34 francs. Per possessurs d’in abunament general u d’ina carta da juniors po il bigliet be custar 10 francs.
Tras la collavuraziun da la Südostbahn e dal club da hockey da Tavau datti da nov era tar ils gieus da campiunadi mintgamai la fin d'emna in tren spezial da Landquart a Turitg.