Lavurar en la branscha da hotellaria u gastronomia n'è betg insatge per in e mintgina. Per Vanessa Stäbler da Cuira èsi dentant spert stà cler ch'ella vuless ir en quella direcziun. Ad ella haja quella branscha adina plaschì. Ella saja stada a fufragnar bleras professiuns e quai saja stà l'unic che haja propi persvas ella. Ad ella plascha il contact cun giasts e la lavur da team.
Er Yannick Spreiter, medemamain da Cuira, chatta ch'i saja ina via che porscha bleras pussaivladads per il futur. In ulteriur punct positiv da la branscha saja ch’ins possia lavurar pli tard en hotels e restaurants en l'entir mund.
Tge che dat en egl: quasi tuttas partenarias e partenaris da discurs han detgas ambiziuns da carriera. La studenta turitgaisa, Sarah Amberg, per exempel, aspira ina posiziun da manar. Sia co-studenta Vanessa Stäbler ha en mira d’ademplir sche pussaivel in auter siemi: manar insacura in agen hotel. Quai saja dentant magari grev. En spezial sch'ins na deriva betg d'ina famiglia d’hotelieras e hoteliers.
Ch'i dat er varts main bellas da la professiun na disturba betg las studentas ed ils students da la scola da turissem ed ospitalitad. Quellas dettia en mintga branscha. I saja la dumonda sco ch'ins confruntescha ellas. Ma per quai vegnia ins era preparà bain durant la scolaziun.
La nova generaziun per la gastronomia e hotellaria para damai d'esser pronta e plain motivaziun, uschia vesa quai er Beatrice Schweighauser, la directura da la scola a Passugg. Ussa sajan dumandads ils singuls manaschis da stgaffir e porscher cundiziuns attractivas.
La dumonda per far ina da las differentas scolaziuns che vegnan purschidas a Passugg saja gronda. Ed i saja ina branscha che ha futur, ina ch'i dovria, damai che nossa societad vuless er vinavant avair la pussaivladad d'ir a mangiar ordaifer e far vacanzas.
