Siglir tar il cuntegn

Header

cuntegn

Igiena Legionellas en duschas publicas en il Grischun

En ils chantuns Grischun e Glaruna datti en mintga 9avla duscha publica memia autas valurs da legionellas. Quai ha communitgà la chanzlia statala glarunaisa.

En dus cas sajan las duschas vegnidas serradas perquai ch'ellas pericliteschian la sanadad. En tut èn vegnidas controlladas 133 duschas en hotels, indrizs da sport, scolas e chasas d'attempads. Tar quellas han 11% da las provas surpassà la valur maximala per legionellas en l’aua da duscha. Manaschis cun resultats betg confurms han stuì mussar co ch’els megliereschan lur controllas. Dus manaschis han stuì prender lur duschas ord funcziun e sanar quellas.

Malsogna da legiunaris è in privel per la vita

Legionellas pon provocar sintoms sumegliants a la grippa. En cas pli rars vegn l'uschenumnada malsogna dals legiunaris, ina inflammaziun dal lom ch'è privlusa da la vita senza vegnir tractada.  Legionellas vegnan transferidas principalmain cun respirar bacterias da l'aua che mainan las bacterias.

Tar temperaturas da l’aua tranter 25 e 45 grads chattan las legionellas cundiziuns idealas per lur multiplicaziun e pon uschia daventar in privel serius per la sanadad umana. Per impedir che questas bacterias s’augmentian en indrizs sanitars sto l’aua avair – tenor communicaziun – almain 60 grads en la sortida dal boiler ed en il sistem directiv 55 grads. La temperatura da l'aua fraida duess puspè esser sut 25 grads.

RTR novitads 16:00

Artitgels legids il pli savens