Siglir tar il cuntegn

Header

Navigaziun

Legenda: Guardar il video Puspè ston ils viticulturs stgaudar lur vignas cun chandailas. Durada 02:21 minutas.
Or da Telesguard dals 06.05.2019.
cuntegn

Grischun Il cumbat dals viticulturs encunter la fradaglia

In matg uschè fraid fa quitads als viticulturs grischuns. Puspè han els da stgaudar lur vignas cun chandailas.

Enturn 600 chandailas per var 6'000 francs ha il viticultur da Fläsch, Christian Hermann plazzà en sias vignas. Quai sajan bain bler raps, dentant en mintga cas ina buna investiziun. Per el saja il stgaudar cun chandailas la meglra alternativa en questa situaziun. Gia l'onn 2017 hajan ellas gidà fitg.

Tuttina, i saja ina gronda sfida, ch'ins haja da cumbatter bunamain mintg'onn cun fradaglias. Ins sentia che la midada dal clima saja arrivada en il Signuradi.

Vinavant na saja betg adina pussaivel d'envidar las chandailas. La notg da sonda sin dumengia - ina notg fitg fraida - haja buffà da memia per pudair envidar ellas. Ed uschia ha Christian Hermann gia vesì emprims donns vida sias plantas. Quant grond ch'il donn è allura effectiv sa mussia, cura ch'i vegni puspè pli chaud.

Christian Hermann resta dentant tuttina optimistic en vista a questa perioda da fradaglia. El spera ch'el n'haja betg da duvrar sia assicuranza da schelira.

RR Telesguard 17:40