Il Grischun copiescha in’idea tudestga

Dapi 15 onns collavureschan parcs natirals tudestgs cun il traffic public. Quai porta dapli passagiers e dapli visitaders. Ed era las organisaziuns da l'ambient han gust vi da questa collavuraziun. Il Grischun vul uss er far profit cun l’idea dals tudestgs.

d. san: Sep Cathomas (Uniun dals parcs Grischuns), Stefan Engler (cussagl d'administraziun Viafier Retica), Dieter Müller (Parc Ela), Kathin Bürglen (Fahrtziel Natur Germania), Christian Stauffer (rait da parcs svizzers) Bild in Lightbox öffnen.

Legenda da maletgs: Ils represchentants da las singulas organisaziuns. G.-M. Maissen

Salvar l’ambient cul traffic public

Il project «Fahrtziel Natur» ha en ils ultims 15 onns gudgnà differents premis ed ha era uschiglio tenor ils iniziants pudì persvader. Perquai èn ins uss era vegnì tar la conclusiun da surpigliar quest'idea per il Grischun. Quai en furma d’ina fasa da test. Per il cas che las experientschas fissan bunas èsi lura l’idea d'engrondir la collavuraziun da parcs cun il traffic public en l’entira Svizra.

6 parcs e 2 firmas da traffic public

Dasper organisaziuns d’ambient collavureschan 6 parcs ( Parc Naziunal Svizzer, Parc Ela, Parc Adula, Parc da Natira Beverin, Biosfera Val Müstair e l’Arena Tectonica Sardona) cun las duas grondas firmas da transport public Viafier Retica e l’Auto da posta.

Ensemen vulan els transportar dapli giasts en las regiuns dals parcs. Quai era a moda ecologica. Per far pli attractiv il traffic public ed ils parcs vul ins porscher differents rabats, pauschalas ed acziuns per ils utilisaders da Fahrtziel Natur.

Cun in bus pon visitaders da parcs natirals arrivar bunamain dapertut. Avrir maletg en lightbox.

Legenda da maletgs: Cun in bus pon visitaders da parcs natirals arrivar bunamain dapertut. MAD

Viafiers federalas na fa betg part

La pli gronda firma da transport na fa dentant betg part al project. Malgrà ch’ils iniziants han trais giadas empruvà da persvader ils responsabels da las Viafiers federalas n'è ina collavuraziun betg gartegiada. Ils motivs n'enconuschan ils iniziants betg. Era la Viafier retica deplorescha questa decisiun.

«  I resta la speranza d'era anc persvader cun temp las Viafiers federalas. »

Stefan Engler
president dal cussegl d'administraziun da la Viafier retica

Per questa stad vegni a dar in bigliet spezial da RailAway. Uschia pon ils giasts da la Bassa tuttina profitar da custs da viadi pli favuraivels. A lunga vista ston ils responsabels dentant chattar in’autra soluziun - cunzunt sch’ins avess suenter ils trais onns da test da decider da far la collavuraziun sin nivel naziunal. Lura na funcziunass il concept strusch pli senza las Viafiers federalas.

RR actualitad 17:00