Siglir tar il cuntegn
Inhalt

Grischun Il luf è puspè fitg activ

En il Grischun ha il luf l'ultim temp stgarpà bleras nursas. Tranter 15 e 20 lufs datti mumentan en il chantun. Ils blers dad els vivan enconuschentamain en il triep da lufs enturn il Calanda. Ils blers cas da stgarps ch'èn vegnids publics en dentant lunsch davent da quella regiun.

I saja grev da dir exactamain quants lufs ch'i dettia en il chantun Grischun. Adrian Arquint, manader da l'Uffizi da chatscha e pestga dal Grischun va or da quai ch'i dettia mumentan tranter 15 e 20 lufs en il chantun.

Il center dals lufs è anc adina il Calanda cun il triep da lufs che viva là dapi il 2012. Ma igl ha adina puspè giuvens lufs che bandunan il triep – per ordinari fan quels pli gronds problems, ergo stgarpan nursas. Cunquai che la populaziun da l'animal stgarpant en il chantun crescha vinavant, datti tenor Adrian Arquint onn per onn pli blers incaps nungiavischads.

Stgarpadas en las regiuns Surselva e Valragn

Las davosas emnas han ins udì da trais differentas stgarpadas pli grondas en las medias. Datiers dal Pass dal Lucmagn ha in luf stgarpà mez fanadur 18 nursas ed avant curt èn durant ina notg otg nursas vegnidas stgarpadas sin l'Alp Gren a Sursaissa. Era a Spleia sin l'Alp Stutz èn entaifer in mais 30 nursas vegnidas stgarpadas.

Daco na datti nagins problems enturn il Calanda?

Atgnamain èsi curius ch'i n'ha fin uss betg dà dapli stgarpadas enturn il Calanda, nua ch'i ha ils pli blers lufs. Il triep da lufs para betg dad esser talmain fixà sin nursas:

Cunquai ch'igl ha blera selvaschina enturn il Calanda, sa nutreschan ils lufs da quels animals.
Autur: Thomas Rofflerpresident da l'Uniun purila Grischun

In auter motiv saja dentant era:

Il triep dal Calanda è pli organisà e stgarpa pli effizient che lufs singuls.
Autur: Adrian Arquintinspectur da chatscha dal chantun

...uschia pon ins almain per gronda part declerar, daco ch'ins auda da cas da stgarps plitost en regiuns lunsch davent dal Calanda.

RR actualitad 17:00