L'idea deriva dal parlament da giuventetgna dal Grischun e vegn sustegnì da tut las partidas giuvnas. Represchentà l'intent en il Cussegl grond han Gian Derungs (AdC), Julia Müller (PS) e Valérie Favre Accola (PPS).
Suenter Glaruna fiss il Grischun pir il segund chantun en Svizra cun il dretg da vuschar cun 16 onns. E per precisar: I va per il dretg da votar ed eleger – dentant betg per il dretg da vegnir elegì en gremis politics.
Parts da PLD e PPS cunter
Entant che las partidas giuvnas sustegnan tuttas l'idea, è l'ala dretga en il Cussegl grond sa mussada spartida en questa dumonda. Quai mussa er il resultat da la votaziun finala:
Regenza persuenter
Il president da la regenza Marcus Caduff ha ditg ch’ina da las finamiras strategicas da la regenza saja d’augmentar la participaziun dals giuvenils a las discussiuns politicas. Or da quest motiv haja la regenza decidì da sustegnair quest’incumbensa.
Per ina giada è il president da la regenza Marcus Caduff sa referì sin ina situaziun privata durant la debatta.
Il pievel decida
La via enfin l'introducziun è dentant anc lunga: Sco emprim sto la regenza uss far ina proposta co midar la Constituziun chantunala, lura datti anc ina giada ina debatta en il Cussegl grond e lura anc ina votaziun dal pievel.