L'onn passà han ins reducì l'illuminaziun da Nadal en blers vitgs ed en intgins lieus han ins schizunt desistì dal tuttafatg da las glischs. Quest onn duai quai dentant puspè sa midar. La cussegliera guvernativa Carmelia Maissen ha gia annunzià avant trais mais bunas novas.
La situaziun d'electricitad è puspè sa meglierada. Ils magasins da gas en Europa èn puspè plains ed era las ovras atomaras en Frantscha èn plainamain en funcziun.
Survista da las vischnancas
Zernez: La vischnanca porscha quest onn puspè dapli spectacul da glisch. Zernez haja fatg in grond pass enavant en connex cun las mesiras da spargnar forza electrica. Gia dus terzs da las glischs èn vegnidas remplazzadas cun glischs da LED, quai di il chanzlist Corsin Scandella.
Laax: La «Perla da Laax» vegn puspè a tarlischar sin il lai ed a Demvitg vegn il grond pignol da Nadal puspè decorà ed illuminà. I na dat naginas restricziuns pli e tut capita sco usità. Quai ha ditg la vischnanca.
San Murezzan: La vischnanca discurra plitost d'ina illuminaziun da Nadal e damain d'ina illuminaziun d'enviern. Sco tut ils onns ardan las glischs en furma d'in sulegl, il simbol da San Murezzan, per lung da las vias. Qua e là è dentant tuttina da chattar in pignol cun chadainas glischantas. Per vinavant spargnar electricitad, vegn la durada reducida da la glisch mantegnida vinavant e tut las lampas èn vegnidas amplifitgadas cun glischs da LED.
Trun: La situaziun resta circa la medema sco l'onn passà. Ins ha desistì da l'illuminaziun al plaz da scola. Las stailas da Nadal vegnan dentant tuttina plazzadas per lung da la via principala, sco mintg'onn
Cuira: Il «feeling d'advent» turna era en la chapitala grischuna. A partir dal prim da december splendura la citad veglia da Cuira puspè en colurs festivas ed en ils quartiers vegnan ils pignols da Nadal puspè decorads ed illuminads, uschia communitgescha la citad.
Suenter che las vias ed ils vitgs èn stads plitost stgirs l'onn passà, lascha l'illuminaziun da Nadal puspè targlischar nossas vias en tut las colurs e furmas.