Uschè spert vegnan il manaders e las manadras dils campadis dal Grischun buca emblidar l'onn 2018. Il Touring Club Svizra (TCS) che surveglia ils campadis a Mustér, Samedan, Scuol e San Murezzan ha tochen ussa savì dumbrar radund 60'000 pernottaziuns quest onn. Quai èn 19,3% dapli pernottaziuns che l'onn passà.
Era auters campadis independents han savì sa legrar da buns resultads. Il campadi «Muglin» da Müstair per exempel ha gì ca. 10% dapli pernottaziuns. Era tar il campadi da Cuira hai dà in augment da ca. 8% en cumparegliaziun cun l'onn passà.
Cas spezial: Campadi «Rein» a Rueras/Sedrun
Ils manaders dal campadi «Rein» Roman Decurtins e Rusina Hilfiker a Rueras/Sedrun èn stads detg surstads, cura ch'els han vis las cifras da quest onn. Els han gì bunamain dubel uschè bleras pernottaziuns sco l'onn passà. Roman Decurtins sa declerar quai augment tranter auter cun il trend da campar tar la giuventegna ed l'aura chauda.
Bler sulegl munta blers giasts da tut ils lieus
Il pledader da medias dal TCS Lukas Reinhardt di ch'il motiv principal per l'augment da quest onn è las temperaturas autas ch'èn restadas - buca mo durant la stagiun principala - mabain era en la stagiun laterala. Plinavant ha el detg che la la maioritad dils giast è da la Svizra, suandà da la Germania e l'Ollanda.
RR actualitad 12:00
