Radund 110 fanatichers da bulieus èn dapi la sonda vargada a Landquart al Plantahof per engrondir lur savida davart il bulieu. Tschertas persunas fan la scolaziun da controllader ed auters èn a Landquart per refrestgentar lur savida.
Ina classa d'experts che vul prender d'enconuscher anc meglier il bulieu
En ina stanza è sa rimnada ina classa da bun 10 persunas – tut persunas che controllan gia bulieus. Sco ellas dian èsi dentant impurtant da prender part a curs da repetiziun. Ina participanta di ch'ils bulieus sajan pli spert ord il chau che quai ch'i vegnian en il chau. Ed emprender san ils controlladers durant ina tala emna da repetiziun ina massa.
L'instructura da questa classa, Rita Illien, di ch'i dettia er per ella talmain blers bulieus nunenconuschents: «Ins vesa adina puspè novs bulieus.» Enconuscher tut ils radund 8'000 bulieus en Svizra saja strusch pussibel.
Per mai na datti betg insatge pli bel che da guardar in'emna mo sin bulieus.
Differenziar quels da mangiar e quels da tissi
Il pli impurtant saja dad enconuscher ils bulieus da tissi. Quai è il tenor en la classa. Il pli malsegir saja il «amanita», declera Rita Ilien. In bulieu insignifitgant che na dat betg spezialmain en egl.
I haja dentant era gia mortoris tar persunas che han mangià quest bulieu. El attatga numnadamain il dir. Sco controllader han ins dentant ina gronda responsabladad. Els dastgan mo dar l'ok tar bulieus, nua ch'els èn 100% segirs ch'els èn buns.
RR actualitad 11:45