Anc trais giadas durmir e lura vegn il bambin. Nadal stat avant porta: dentant betg tar tuts. Er en il Grischun datti famiglias che na festiveschan betg Nadal, perquai ch'ellas han in'autra religiun. Co passentan els il temp da Nadal en in conturn cristian?
Il hinduissem è suenter il cristianissem e l'islam la terz gronda religiun dal mund. Ils hindus crain vid la reincarnaziun, pia che la vita e la mort èn part d'in ciclus infinit. L'uniun tamila-hinduistica dal Grischun dumbra varga 200 famiglias che prendan part regularmain a las ceremonias en il tempel hinduistic a Zezras.
En il Grischun datti varga 200 famiglias hinduisticas. Senthilnathan Thevasunderalingam e sia famiglia è ina da quellas famiglias che na festivescha betg quella festa en lur religiun. Durant il temps d'advent èn ils blers da lur uniun tamil-hinduistica vi da far gigina. Perquai datti en quai temps bleras ceremonias spezialas cun spirituals professiunals da Sri Lanka. L'uniun posseda dapi il 2015 in nov tempel hinduistic a Zezras che porscha avunda plaz per tut ils cartents.
Senthilnathan da Sri Lanka senta era Nadal
Dal tut senza Nadal na giaja quai dentant tuttina betg. Senthilnathan Thevasunderalingam è vegni avant bunamain 30 onns tut sulet en Svizra ed n'ha a l'entschatta betg propi festivà Nadal. Dapi che ses uffants van dentant a scola, ha Senthilnathan Thevasunderalingam decidì da midar quai. Per far in plaschair ad els, dettia tar els a chasa uss era in pignol da Nadal. Quai na saja nagin problem en sia religiun, ils hindus sajan averts per tut. «Jau sent era Nadal. Uss viv jau per mes uffants. Quai che fa plaschair ad els, fa era cuntent mai.»
1 / 9
Legenda:
Ils hindus da l'uniun tamila dal Grischun fan mumentan gigina.
RTR
2 / 9
Legenda:
In spiritual professiunal da Sri Lanka maina las ceremonias spezialas en il tempel hinduistic a Zezras.
RTR
3 / 9
Legenda:
Passa 200 famiglias vegnan regularmain en il tempel per urar tar ils Dieus e las Dieuas.
RTR
4 / 9
Legenda:
Senthilnathan Thevasunderalingam è vegni avant bun 30 onns en Svizra. En il fratemp ha el era cumenzà a schatzegiar il temp d'advent.
RTR
5 / 9
Legenda:
Mathoomitha e siu frar Nithilhan Senthilnathan da Cazas han era vulì far Nadal sco lur camerats da scola.
RTR
6 / 9
Legenda:
Perquai han era els dastgà far si in pignol da Nadal en stiva.
RTR
7 / 9
Legenda:
Sut il pignol spetgan sco era tar ils amis da scola ils regals da Nadal sin ils uffants.
RTR
8 / 9
Legenda:
A chasa tar la famiglia hinduistica datti spezialitads da Sri Lanka. Dentant na betg mo: las fin d'emnas datti era tratgas europeicas.
RTR
9 / 9
Legenda:
Sin maisa n'arda zuar betg il tschupè d'advent, mabain ina chandaila.
RTR
