Siglir tar il cuntegn

Header

audio
Vendiders da maruns a Cuira
Or da Actualitad dals 05.12.2023. Maletg: RTR
laschar ir. Durada: 6 minutas 2 Secundas.
cuntegn

Ils maruns – quai dat chaud La nauscha racolta pudess sminuir la stagiun da vendita da maruns

Dapi decennis tutgan las chasas da maruns durant l'atun ed enviern tar il maletg da la citad da Cuira. Quellas chasas vegnan er manadas dapi daditg da la medema famiglia. Actualmain maina il vendider da maruns Remo ils dus stans sin la via da la staziun. Quest onn è sia 41avla stagiun davos las padellas. El ha surpiglià l'affar da ses bab e da ses tat.

Gia da pitschen ensi sun jau vegnì bler en contact cun la fatschenta da mes bab. Uschia n'è la decisiun betg stada greva da cuntinuar cun quella fatschenta.
Autur: Remo vendider da maruns

Dapi 15 onns lavura er sia dunna Renate sin il stan da maruns, ed er il rest dal team consista da parentella. Remo sez ha uss 65 onns, e na pensa anc ditg betg da chalar. In di duessan però er ses uffants surpigliar l'affar. Quels fan il mument anc in'autra scolaziun.

Il stan è avert mintga di tranter las 11:00 e las 19:00. La stagiun cumenza la fin da settember. Quant ditg che la stagiun dura, dependa però surtut da la racolta dals purs da maruns. Quest onn guarda quai ora main bun. Las temperaturas memia autas han procurà che la racolta è stada plitost magra. Sche Remo e ses team pon avair avert quest enviern sco previs fin il mars, n'è perquai anc betg cler. Malgrà che la Spagna è la pli gronda producenta da maruns da l'Europa, retira Remo uss sia martganzia da l'Italia.

Er la svieuta è sa diminuida sur ils onns. Schebain ch'ils maruns valevan sco take-away snack saun avant blers onns e sco ina tscherta exclusivitad, è la spierta d'alternativas ozendi bler pli gronda.

RTR actualitad 07:00

Artitgels legids il pli savens