Venderdi en damaun, punctualmain a las set èn ils mopeds partids davent da la plazza Arcas a Cuira. I è la segunda tura da moped uffiziala davent da Cuira ad Ascona. Il viadi maina da Cuira tras la Tumleastga sur il pass dal San Bernardino en direcziun Tessin. In viadi pacific nà dal tempo.
In viadi pacific
Suenter in'ura e mesa è la gruppa arrivada en la Viamala. In'ura e mesa - perquai che cun mopeds na dastg'ins betg charrar pli svelt che cun 30 km/l'ura en Svizra. La tura saja organisada a moda professiunala di il reporter Gian-Marco Maissen ch'accumpogna la gruppa enfin mezdi. I dettia in plan precis cun ruta e pausas. Per pannas dettia mecanists ch'in possia clamar via chat sin What's app.
Il San Bernardino è stà ina sfida
Entant ha la gruppa passà il San Bernardino. Il pass saja stà ina sfida perquai ch'ils motors na tirian betg uschè bain cur ch'i va ensi. Ultra da quai sajan las temperaturas pli fraidas che quintà, conferma er Gian Nuot Tschander che fa medemamain part a questa tura en il Tessin.
Tut ha cumenzà cun ina idea sturna
Tge che tuna sco in'idea da giuvenils è il project da creschids. 80 töffins van en diesch dis en direcziun Ascona. L’idea era adina puspè en l’aria da far ina tura da töffins, di Ivo «FiFi» Frei. Dentant n'avess el ditg betg pensà che quell'idea vegnia propi realisada ina giada.
Avant dus onns han plirs amaturs da mopeds fundà la gruppa Waazzoouu’s. Ed in onn pli tard han els fatg l’emprima giada il viadi da Cuira ad Ascona.
Or dad in pign project è daventà in eveniment turistic
La segund'ediziun quest onn è ussa dentant bler pli gronda. Gia passa 80 persunas èn s'annunziadas. L'eveniment vegn sustegnì d’ina firma da transport sco era d'ina firma da reparatura da töffins. Era las organisaziuns turisticas da Cuira ed Ascona sco era da la Viamala fan part da l'eveniment.
Sco Leonie Liesch da Cuira Turissem di, vegn quest eveniment a purtar ulteriuras pernottaziuns a Cuira. Quai mussia era la glista d’annunzias cun participants da la bassa, dal Tessin sco er da la Germania. Cun quai che la tura cumenzà gia la damaun baud da las set vegnan quellas persunas a durmir en la regiun da Cuira, uschia Leonie Liesch.
En indesch uras da Cuira ad Ascona
Ils töfflis partan ils 27 da matg la bun'ura baud da las set sin la plazza d’arcas. L'emprim vegn la gruppa a far ina runda tras la citad veglia avant ch’ella va lura tras la regiun Viamala, San Bernardino, Lostallo ad Ascona. Als differents lieus datti lura mintgamai insatge da mangiar ni in auter divertiment. Planisà è che la gruppa arriva lura finalmain da las sis la saira ad Ascona. Quai cun pernottaziun venderdi saira ad Ascona.
RR actualitad 11:00