Siglir tar il cuntegn

Header

cuntegn

Immobiglias Banca Chantunala Grischuna pudess perder 60 milliuns euros

La Banca Chantunala Grischuna pudess perder 60 milliuns euros en connex cun il concern d'immobiglias austriac Signa ch'è collabà.

La banca chantunala è in dals crediturs svizzers dal concern austriac Signa, sco ina glista publitgada da differentas medias mussa. Sin dumonda da l'agentura da novitads FMR ha la GKB respundì, che per ella valia il princip da betg s'exprimer tar eventualas u effectivas relaziuns da fatschenta.

Auts debits tar pliras bancas

La glista da crediturs publitgada numna sper la Banca Chantunala Grischuna cun 60,8 milliuns euros era las bancas chantunalas da la Sursilvania (25,3 milliuns euros), dal Vallais (25,3) e da Turitg (11,1). Ultra da quai debitescha la Signa era 30 milliuns euros a la banca privata turitgaisa IHAG, ed a la banca da la Migros cun passa 100 milliuns euros. La gasetta tudestga «Bild» scriva da 129 milliuns euros, mo la Migros ch'aveva vendì la fatschenta Globus a la Signa na vul betg ora cun il marmugn: ch’ins haja decidì lezza giada da tegnair a dascus la summa da vendita. Er da las ulteriuras bancas n'ha nagina vulì prender posiziun en chaussa, auter che la Banca Chantunala Vallesana. Quella discurra en sia communicaziun da debits da 24,3 milliuns francs, na numna dentant betg il num dal creditur.

Gia enconuschents èn ils auts daivets da la Signa tar la Banca Julius Bär. Quella ha gia confermà il november indirect ina summa da passa 600 milliuns francs. Ed era la Banca Chantunala da l’Argovia ha concedì l’emna passada credits da passa 70 milliuns francs a la Signa.

Signa haja debits totals da 12 milliardas euros

Il concern d'immobiglias Signa è vegnì massivamain en las stretgas pervia dals tschains ch'èn creschids. Ils debits totals muntian a radund 12 milliardas euros. Las emnas passadas han tant la societad da holding Signa sco era bleras autras societads che tutgan tar la gruppa Signa annunzià insolvenza. En Svizra posseda la gruppa d'immobiglias da l'investur austriac René Benko ina cumpart da 50% da la gruppa Globus, ulteriurs 50 % posseda la Central Group tailandaisa.

audio
Per tadlar: curt e cumpact
ord RTR Audio dals 17.01.2024.
laschar ir. Durada: 1 minuta 12 Secundas.

RTR novitads 06:00

Artitgels legids il pli savens